خیاللار کوچهسی
کوچهنین گیرهجگیندهکی چیلچیراق ساتان دوکان، طنطنهلی ایشیقلار … او، اؤزونو دوغما بیر یئرده حس ائتدی. شولوقلوقلار ایچینده تانیمیشدی او کوچهنی. داریخان بالاجا اورهگی، داها دا داریخماغا باشلادی. آخی بو کوچه اونو دوغمالارینا آپاران کوچه ایدی. بو کوچه اونون هر گئجه قوردوغو خیاللارینین، یوخولارینین کوچهسی ایدی.
او هر گون، گئجهنین دوشمگینی صبرسیزلیکله گؤزلهییردی. آخی گئجهلر باشینی یاسدیغا قویاندا، بؤیوک ددهسینین سسینی ائشیدیردی. یئنه «آغاجان»ی ایله «بؤیوک مامان»ی دالاشیردی. هر گئجه اولدوغو کیمی، بو گئجه ده یئرینه گیرمگه تلهسدی. اونلارین سسینی ائشیده بیلمک اوچون، تکجه یول بو ایدی. هله گؤزونو یوماندا ائوی ده گؤره بیلیردی. یالنیز آناسیندان باشقا. آخرینجی دفعه اونو گؤرنده، بوینونو قوجاقلاییب آغلامیشدی. او آناسینین آخیر واختلار تئز-تئز آغلادیغینین شاهیدی اولموشدو. آناسینین ماهنییا قولاق آسا-آسا آغلادیغینی گؤرنده، اوشاق سادهلیگی ایله سوروشدو:
– بو کیم دی؟
– دوستومدو.
– بس نییه آغلاییرسان؟
– هئچ. ائله بئله.
آرتیق سحر آچیلمیشدی. کیچیک دونیاسی ایله قوردوغو شیرین خیاللاردان آییلمیشدی مراد. آمما دونن گؤردوگو کوچه، یادیندان چیخمیردی. اورهگینی کیمهسه آچماق ایستهییردی. او کیم، مرادین آنالیغی ایدی. آنالیغی اؤزونو اونا هر زامان «مامان» کیمی تقدیم ائتسهده، مراد اونو اؤز آناسینین یئرینده گؤرمگه آلیشمامیشدی. آنجاق بو آنالیق کیچیک مرادین سیرلرینی پایلاشا بیلهجک بیر دوست، یاخشی سیرداش ایدی. آتاسینین سرت داورانیشلاریندان قورخان مراد، آنالیغینی اونون کؤمگینه گلهجک یگانه آدام بیلیردی:
نهایت او، قورخا قورخا دئمیشدی:
– باخ، یولدا او چیراقلی توکان وار ایدی ها، اوردادیر منیم آنام.
– گؤرمهدیم.
– سنین عمینین دوکانینین یانیندا ایدی دا … آپارارسان منی؟
«مامان» هئچ نه دئمهدی. گؤزلرینی کیچیلدیب، اوزاقلارا باخان کیمی فیکیرلشیردی.
* * *
آتاسی ایشدن قاییتمیشدی. مرادی یانینا چاغیردی.
– مگر سنه دئمهمیشم کی آرتیق «لاله مامان» دان دانیشمایاجاقسان …
گئجه باشینی یاسدیغا قویدو. یئنه آغاجانین سسی گلیردی. اونو سسلهییردی: «مراد بالا! …»
بیر دامجی یاش گؤزوندن آخیب، یاسدیغینا دوشدو. یورقانی باشینا چکدی. گؤزلرینی برک-برک یومدو، خیال دونیاسیندان آیریلماماق اوچون.
____________
تورکجه همشهری
Leave a comment